नइ प्रकाशन
Nai Prakashan
»  नइ प्रकाशन गैरराजनीतिक साहित्यिक, सांस्कृतिक र सामाजिक संस्था हो ।   

समकालीन कविता

भ्यालेन्टाइन
प्रेमा शाह

माया पोख्नलाई बहानानै चाहिन्छ र ?
माया सिंगार्न  पर्व नै चाहिन्छ र ?
मुस्कान स्विकार्न
ढुकढुकीसित लयबद्ध हुन
किन चाहिन्छ अनुमती
?
मन
,
न ब्यारेक - न युद्धरत सिपाही
न सिमाङ्कन छ यसको

न सङ्घीयता स्विकार्छ मन
प्रेमनै धर्म र नीति मनको
भूगोल नभएको प्रेम !

 इतिहास भन्दा परको प्रेम
पहाडसँग चुलिरहेको प्रेम
सागर जस्तो युगिन प्रेम !


घामले माया गरेर
जुनले सुम्सुम्याएर
अनुभुत भएको प्रेम
हामीले पत्याएको प्रेम
प्रेमले पत्त्याएको हामी !


हामी भित्र सधैं गुलाब फुलिरहेकोछ
मनको बगैचामा कहाँ प्रवेश निषेध
अर्को मनको सुगन्धलाई
कहिलेदेखि उडिरहेछन् आकाशमा चराहरु
कहिलेदेखि बुझिरहेछ आकाशले चराहरु !

 

पहाड भैसकेको मन , सागर भैसकेको मन
घाम, आकाश र चरा भैसकेको मन
बुझ्दैन अहिले कार्डसित बिकिरहेको बोली
"विल यू बि माइ भ्यालेन्टाइन ?"
उ बुझ्छ यति
प्रेम न अनुनय, न विनय
न आग्रह , न साईनो !

•••
प्रेमा शाहको परिचय
जन्म:
२००२ साल असार १६ गते शुक्रबार (वीरगन्ज)

चिनाको नाउँ:
गिरिराजलक्ष्मी शाह

बुबाआमा:
पूर्णेन्द्रविक्रम शाहअरुणा शाह

शिक्षा: 
एमए, नेपाली (त्रिवि : २०२६)
प्राध्यापन:
ठाकुरराम क्याम्पस (वीरगन्ज)महेन्द्र बहुमुखी क्याम्पस (नेपालगन्ज)

अध्यापक:
नवजीवन विद्याश्रम (सर्लाही)

संस्थापक अध्यक्ष:
नारायणी वाङमय प्रतिष्ठान

कृति: 
• ‘पहेँलो गुलाफ’ (कथासङ्ग्रह : २०२३) 
• ‘विषयान्तर’ (कथासङ्ग्रह : २०२८) 
• ‘ममी(लघु उपन्यास २०४०)
• ‘आकाश विभाजित छ’ (उपन्यास : चार जना स्रष्टाद्वारा लिखित)
• ‘जिन्की र जोकर’ (२०४० : बालकथासङ्ग्रह)
• ‘मन्टुकी बज्यैको कथाको पेटारो’ (२०४० : बाल कथासङ्ग्रह)
• ‘रामेको कथा’ (२०४२ : बाल उपन्यास)
• ‘इन्द्रधनुष’ (२०४२ : बाल कथासङ्ग्रह)
• ‘आनन्दको आविष्कार’ (२०४३ : बाल उपन्यास)
• ‘मनु र भँगेरा’ (२०४३ : बाल उपन्यास)
• ‘रङ्गीचङ्गी कथाहरू’ (२०४५ : बाल कथासङ्ग्रह)
• ‘राम्रो काम’ (२०५१ : बाल कथासङ्ग्रह)
• ‘रेका केही कथा’ (२०५१ :  बाल कथासङ्ग्रह)

सम्पादन:
• 'देउराली •‘बिहान’ •‘हिमानी•‘उज्यालो

पुरस्कार:
मैनाली कथा पुरस्कार
मैना पुरस्कार
विश्वनारी नेपाली साहित्य सम्मान
विश्वनारी नेपाली साहित्य पदक

छोरी:
जल शाह : जन्म २०३९ (नेपाली चलचित्रकी प्रसिद्ध नायिका)

भ्रमण:
नेपाल राज्यका विभिन्न ठाउँ

भारत हङकङ थाइल्यान्ड जापान कतार • अमेरिका
निधन:
२०७४ साल पुस ५ गते (अमेरिका)